الحراك الثوري (الاثنين 6/12)
*****************************
✍🏼 : مهادن الزعيم
✵ الليلة عدد من تنسيقات امدرمان قرروا انهم يمشوا بموكب من امدرمان لي بحري وبرضو في جز۽ من الثوار قررو يشتغلو في امدرمان (ديمقراطية ثورة وكدا) …
✵ الساعة الواحدة بتوقيت الثورة بدأ الثوار في التجمع في صينية الازهري بأعداد بسيطة (في البداية بعض الناس جاهم احباط من انو الموكب ماحايكون بعظمة امدرمان) …
✵ الموكب في صينية الازهري قعد اكتر من ساعة ونص وبدت المواكب تجينا من العباسية وابوروف وودنوباوي وامبدات وناس امدرمان جنوب واصبح الحشد اكبر مما كنا نتمنى …
✵ الساعة 2 ونص اتحرك الموكب من امدرمان صوب كبري شمبات بحشود خرافية (ثوار على مد البصر) حرفيا الموكب لمن بدا ينزل من كبري شمبات الى بحري كان اخر الموكب لسة م طلع الكبري ذاتو ….
✵ وصلنا بحري لقينا في موكب كامل من ثوار بحري شايلين اعلام ورافعين لافتات ترحب بثوار امدرمان في بحري (قالو دا اسمه موكب الاستقبال) ….
✵ وصلنا جمب المستشفۑ الدولي فهتف كل ثوار امدرمان لطاقم المستشفى الكانو واقفين برة كلهم هتفنا ليهم (شكرا شكرا جيشنا الابيض) ….
✵ طبعا لمن وصلنا المؤسسة وكنا بنهتف بصوت واحد (نحن منو … اولاد امدر … جايين لي شنو جايين للصبة) (امدرمان مافيها جبان) (كل القوة بحري جوة) حسينا انو هتافنا ممكن يكون وصل لحدي القصر عاااادي …
✵ بعدها اتوحدنا كلنا في هتاف واحد (الثورة ثورة شعب والسلطة سلطة شعب والعسكر للثكنات والشارع للمكنات) (الشعب شعب اقوى والردة مستحيلة) (يابرهان ثكناتك اولى مافي مليشيا بتحكم دولة) بعد ما كلنا وقفنا دقيقة صمت على ارواح الشهدا۽ وقرينا ليهم الفاتحة ورددنا نشيد العلم …
✵ طبعا لقينا ناس المؤسسة بتغالطوا (هل كبير موكب امدرمان ولا شرق النيل) ومن هنا عرفنا انو ناس الحجفان م قصرو وجو بموكب خرافي مادام بقارنوهم بينا ….
✵ والغريبة انو لمن كنا راجعين بعد المغرب اصرينا الا نرجع بموكب ذي م جيبنا واتجمعنا فوق الكبري وهتافنا يهز الارض ومولعين فلاشات التلفونات لتشكل اعظم لوحة مع اصوات الطبول والهتاف …
✵ بعد المغرب اتعرض موكب بحري في شارع المعونة للقمع من قبل القوات الامنية وتمت مطاردة الثوار في الشوارع وتم اطلاق البمبان داخل المحال التجارية …..
✵ ثوار الكلاكلات ومناطق جنوب الخرطو اتجمعوا في مشهد مهيب وحشود خرافية بميدان الكلاكلة القلعة ظهر اليوم …. وناس الشجرة عملوا قام بالضلام ونفذوا اعتصام اليوم الواحد براهم وبعد دا كلو حشدهم كان خرافي …
✵ ثوار الخرطوم شرق اتجمعوا في موكب حاشد جدا وكلهم مشوا ميدان الشهيد عباس فرح ونفذوا اعتصام اليوم الواحد رغم الهجوم الاتعرضو ليهو بالسكاكين والسواطير من قبل النقرز الا انهم صمدوا وحققوا هدفهم في الحشد والاعتصام …
✵ ثوار تنسيقات الخرطوم وسط اصروا الا يمشو القصر (ركوب رأس) وفعلا حشدو موكب ضخم جدا في باشدار واتهجوا الي القصر الجمهوري واتعرضوا للقمع في تقاطع الجمهورية مع القصر لكنهم صمدو لحدي قريب االمغرب…
✵ ثوار جنوب الحزام لو عاينت للصور بس ح تشوف حشد ماممكن تتخيلو ذاتو وحاتلقاهم رافعين اللساتك والاعلام فوق سواااااا ….
✵ ثوار مدني كالعادة حشودهم خيالية وهتافهم قوي لمن طلعوا الشارع والشرطة حاولت منعهم لكنهم اجبروها علي فتح الشارع بالهتافات والحشود فقط …
✵ ثوار سنار عملوا موكب حاشد جدا ومشوا كداري من سنار لحدي مايرنو في ذكرى انطلاق الثورة من هناك في العام 2018 وهناك لقوا حشود خرافية من ثوار مايرنو في إنتظارهم بالهتافات المضادة للعساكر والخنوع …
✵ في دفتر اليوم الثوري عاودت مدن (الضعين وكادقلي) الظهور بقوة بعد غياب كم موكب وانضمت الفولة لركب الثورة بموكب قوي …
✵ نهر النيل كالعادة كانت حضور قوي ومشرف في دفتر اليوم بمواكب قوية انطلقت في الدامر وعطبرة الثورة في ذات الوقت …
✵ كما شهدت مدن نيالا وربك والدمازين ودنقلا وبورتسودان وكسلا مواكب قوية كلها طالبت بإسقاط الانقلاب …
✵ في القضارف طلعوا بموكب كبير واتعرض عدد من الثوار للاعتقال وهتفوا وهم معتقلين في تاتشرات القوات الامنية ولمن طلعوا جز۽ منهم بعد المغرب عملوا موكب تاني ….
✵ لحدي الان مافي احصائية للمعتقلين ولا المصابين (لو عارف منطقة طلعت وما مذكورة في التقرير دا ياريت تعلق بي لنك او صور للشغل مع ذكر اسم المنطقة) ملحق مع التقرير لصور وفيديوهات لاغلب فعاليات اليوم الثورية …. الشعب اقوى والردة مستحيلة ….
#موكب6ديسمبر
سلام ومحبة
مهادن الزعيم
