حسن بكري يكتب..

جربنا ان نموت وننتصر للحياة والأن نجرب ان نحيا لننتصر لمن مات

*لأي ظرف ماقدرت تطلع اعرف انك ما اقل من زول طالع وبحسب تجربتي لولا دعم الفي البيوت ماكان ضقنا طعم للحرية والله

*البقدر يكون قدام والمابقدر يتأخر والمابقدر يقيف لبعيد ويصور المابقدر يدعم بالمال والمابقدر بالدعوات
ماكلنا لازم نعمل نفس الشي بس عملنا كلنا لازم يوصل لشي واحد والله لو كان عاوزنا كلنا زي بعض كان خلقنا نمل
لكل واحد فينا دور يقوم بيهو

*مرقت انت مشروع شهيد او معتقل او مصاب في كل الاحوال خليك نضيف من جوه وبره

*مانفتح مواضيع خلافية ولو زول عملها نهتف شعب واحد حلم واحد والشعب اقوى اقوى

*لو سايق ووضعك بتحمل خلي العربية في شارع رئيسي ممكن تكون ترس ياكمان بركن في شارع فرعي لو مابتتحمل تخسر قزاز او لستك

*تأمين اسر الشهداء مسؤوليتنا كلنا في الموكب وتأمين الموكب كذلك عاين حوالينك في زول بتصرف غلط بتحرش بحرض بصور ناس بعينهم وعاين فوق العمارات الشقق الفاتحة ع شارعك واتحرك ماتكون في مكان واحد اتقدم واتأخر عشان تشوف اكتر

*مانصور وجوه الناس البتنظم او البتوجه او البتشارك في التأمين والتصدي

*عاين فوق للبمبان و لما نتراجع ارجع بضهرك وعينك عليهم

*كلما ترسنا الشوارع الفرعية حمينا شارعنا النحن فيهو

*نلتف حولهم ونشتتهم مايلتفو حولنا ويشتتونا

*مانتلم كتار في مصاب بكون محتاج نفس ونشوف المسعفين هم جايين لي دا

*مانقع في فخ العنف سلاحنا ايمان بقضيتنا وهتافنا لاغير

* ماندخل كتار في بيت واحد وماندخل في بيت فاتح ع شارع رئيسي ونخلي ست البيت او سيدو بره يشوفو لينا الحاصل

*ماينفع ١٩يكون زي كل الايام وصلنا دا المطلوب ولو ماوصلنا نترس ورانا ترس يتفك في اسبوع ترس ماخمج نخلي العصيان امر واقع

*ماتمرق بتلفونك الاسمارت ولو ماعندك تلفون صغير يبقى نضفه من الصور والفيدوهات ماينفع تطلع بدون تلفون ولو ناشط او فعال في الحراك امسح واتساب وفيس بوك بمجرد احساسك بخطر عشان هيجبروك تفتحه وممكن تأذي غيرك

*اتعرضت لأعتقال انسي بره في شنو وارخي جسمك انت ما اشفت من البره هيكملو وتمرق حر
وافترض انك هتكون معتقل لفترة طويلة ماتفكر في هطلع متين العشم مرات بروح

*مافي انقلاب في صالح الثورة لو حصل اي انقلاب نحن ضد الفكرة ما الاشخاص
وفرق بين الانقلاب والانحياز البنحاز ليك بحميك وبحمي خياراتك مابفرض امر واقع ويكون وصي
حسن بكري