دينج دي قوج يكتب عن مهر الزواج بدولة جنوب السودان
مهور الزواج عند دينكا شمال أعالي النيل (إبيلانق/أقير/نييل/دونقجول) محددة …والتحديد ده قرار حديث وكان بعد الاستقرار النسبى للمنطقة …
ماكان في أ سقف لعدد الابقار ، ولكن عند التحديد كان الفلسفة خلف القرار من كبارنا انو بعد الحروبات الكثيرة دى وعدم الاستقرار ده لاكثر من قرن ..الناس انتهت ..ولازم نحدد المهر ويتم تشجيع الزواج والخلفة…وتم تحديده ب25 رأس كالاتى ( 20بقرة و4ثيران و1ثور مخصى ) لا تدفع كلها بل تدفع نص العدد وتبقى مع العروسة 3بقرات علشان تربى عيالها حتى ولو الزوج عنده ….باقى المال بتم دفعه بعدييين وقت بت بتكم يعروسها حتن تجو تشيلوا باقى مال بتكم (ام العروسة ) البقت عجوزة دى …
اها فى نفس الوقت داك جابوا قرار كمان كان شوية غريب انو زادو “الدية ” من الكان سائد الى مضاعف (حاعمل بوست منفصل اشرحه ) خلينا فى المهور حسع ….
طيب الحصل شنو ؟
انو اهلنا وقعوا فى العرس خماسى سداسى …الخ مافى شاب اعزب ومافى بت بتصل العشرين زاتو الا وكانت فى بيتها وشايله 3 او 4 جنا …وقت التعليم جا ماعندنا بت مشت المدرسة الا بت الناظر لول وبنات بعض العمد والشيوخ….والموضوع مشى ذى ده …
طيب وقت جينا فى فى نهاية الستينات الوضع اتغير شوية ولكن نسبة التسرب فى التعليم الابتدائي للاولاد من المدارس 80% والبنات99% عديل الوضع اتحسن شوية فى نهاية الثمانينيات وقت الحرب ونزوح اسر كثيرة الى المدن فى المنطقة وخارج المنطقة فارتفعت الرغبة لتعليم البنات والاولاد معا وانخفضت نسبة التسرب فى التعليم الابتدائي الى 5_10% ولكن فى التعليم المتوسط والعالى برضو البنات عندنا كان تسربهن عالى جدا يكاد تصل ال70_80%
يعنى ال100بت الدخلوا مدرسة ..الدفعة وقت يجوا يمتحنوا الشهادة السودانية بتلقى منهن 20الى 30بت فقط والباقى فى بيوتهن ….
أها كبارنا برضو القصة دى وجعتهم وقالوا نشوف حل ….الحل شنو هل نرجع ونفتح سقف المهور ؟ الإجابة كان فيهو إبداع….
قالوا لاااااا …
لكن مشكلة الدينكا ديل دايرين بقر ….يبقى نخلى الرقم ذى ماهو 25 بقرة لكن نضيف ابقار اضافية لتعليم البت …والبقر المضاف حسب تعليم البت بيتم دفعه فورا ماعنده علاقة بالنظام التقليدى …..ال25بقرة يطبقوا فيهو التقليدى بس ….اهاعملوا شنو ؟ اضافوا حسب شهادات البت كالاتى : اى تضاف
5بقرات للشهادة السودانية
10 بقرة للشهادة الجامعية
20بقرة للماجستير
ماعندنا بت عملت دكتوراة قبل زواجها ولكن لو حصل اكيد حتكون 30بقرة …
المهم الكلام ده يا شباب شجع الاهالى لاستمرارية البنات فى مقاعد الدراسة فكان عادى اى عريس يجى للاب بقوم بحسبها حسب فهمه انو بته دى كلما مشت قدام كلما دفعوا ليهو مهر اكثر …
ده الفهم الغالب يا جماعة..وده كان تفكير بخاطب تفكيرهم وتصوراتهم لبناتهن وقد نجح الامر ..ده طبعا ما عنده علاقة بالاباء المتعلمين او القاطنين فى المدن ….
اى قرار ما بخاطب مفاهيم وتصورات وانساق المجتمع بكون غير فاعل وماعنده قيمة ….
قرار إسرة د رياك مشار والسيدة أنجلينا تينج لو ده قرار شاور فيهو عشيرته وقبلوه وحيطبقوه فأكيد حيكون مفيد لمجتمعهم …لانو اكثر العنف الحاصل فى مثلث (البحيرات/واراب/الوحدة) جاى من سرقة الابقار فى التيجان من الشباب…والسبب طبعا دايرين يتزوجوا والمهور ذى ماعارفين 500بقرة او 200بالميت …
البوست مهداه اليهم ..وبالله خلينا نشجعهم انهم يبتدعوا ميكانزيمات فاعلة يعالجوا بيهو نسق الزواج والديات ،ايوة يشوفوا حلول تناسب عقلية الناس الفى تيجان …
