نحن منو؟ ******* مهادن الزعيم

¶ نحن الجيل البسبسب شعرو ويبرمو ويحلق على الموضة ويلبس كباية معاها شحاطة وفريم دوكو لانو لقينا قدامنا كيزان لابسين محترمين ومربيين دقون قدر المقشاشة وفي النهاية واتقبضوا في جرائم اخلاقية مابعملا مراهق (من هنا عرفنا المظهر ماعندو علاقة بالاخلاق) …
¶ نحن الجيل الحضر (الهجرة الي الله) (والرجوع الي الله ) (والفرار الي الله) (وصلاة الحوجة) (وصلاة الاحتجاج) وطلع دا في النهاية دا كلو نفاق كيزان لمن كرهونا في الدين (كان لازم يسقطوا حفاظا علي تدين المجتمع السوداني من الاختلاط بنفاقهم) …
¶ نحن الجيل الكان البخش الفيس عشان يعلق علي منشورات بخيتة بتبقي ليك شنو وتاقي زول مشهور يمكن يرد ليك لكن لمن الساعة دقت ثورة (الا وقت الحارة دقت … كنا قدام الزحام … بهتافنا غطينا الشوارع … سلمية سقطنا النظام) ….
¶ نحن الجيل الماكان بهتم بالقراية والتعليم بنزوغ من المدرسة وندك المحاضرة عشان عارفيت الشغل في زمن الكيزان بالواسطة عشان كدا كان لازم نطلع ثورة ونفضى علي الواسطة حفاظا على مستقبل الاجيال الجاية ….
¶ نحن الجيل الحضر المعجزات (الجقور اكلت الكبري) (والنمل اكل السكر) (والضب بووظ الهناي وقطع الكهرباء) (والجن الكشف امتحان الكيمياء) (ونظرية الدفاع بالنظر) وبعد دا دايرننا نتعامل بالعقل عشان كدا طلعنا في ثورة مجنونة بكل للمقاييس…
¶ نحن الجيل المابفرق بين (الطيب صالح) (وعبدالله الطيب) ومابعرف زول من جيل الاستقلال غير الازهري لانو الكلام دا م لاقانا في المناهج بسبب تغيبر المناهج العملوهو الكيزان اكتر من مرة ف كان لازم نطلع الشارع ونسقط السخف دا عشان الاجيال الجاية تلقى بيئة كويسة ويعرفوا تاريخ بلدنا ….
¶ نحن الجيل الحافظ لعيبة الريال والبارسا والليفر واليوفي والميلان والمانيو وارسنال لكن ماعارفين السودان شال كاس افريقيا سنة كم وهدف الفوز سجلو منو لاننا اتربينا في زمن الكيزان الكانو بعتبرو الكورة لهو فقط (عشان كدا طلعنا ثورة عشان نصلح واقع كورتنا للافضل) …
¶ نحن الجيل الاتولد وعاش في ظل حكم البشير وكيزانو عايزننا نطلع كيف يعني نحن نتاج طبيعي لتعليم عقيم واقتصاد واقع ونظام دكتاتوري وغياب تام للوعي وانحطاط في الاخلاق والظلم والمحسوبية (عشان كدا طلعنا ثورة عليهم عشان نخلي واقع افضل للورانا) …..
¶ نحن نمثل نموزج حي لفشل لحصاد زرع البشير وكيزانو لاننا اتربينا في عهد حكمهم الاسلامي كما يقولون وطلعنا اكتر ناس قليلين ادب (في نظرهم) في حين هم الاتربوا في ظل حكم م اسلامي (حسب قولهم) طلعتو مسلمين (سبحان الله) ف قلنا نسقطهم عشان نرجع اسلامنا …
¶ الكيزان بكرهونا عشان بشوفو فشلهم وفشل مشروعهم فينا وفي ملامحنا وفي اصواتنا العالية في الاماكن العامة وفي حاجة بنعملا وعمرهم ماحاولو يفهمونا ويفهوا طريقة تفكيرنا حتى لمن قوش قال داير يتحاور معانا فتح لينا محلات الشيشة (قصر نظر ليس الا) …
¶ الكيزان اوجعهم السقوط جدا لكن م اوجعهم جدا ان يكون سقوطهم على يد هذا الجيل بالتحديد (حتى بطولاتنا قدام آلة قمعهم بعتبروها صادرة من مساطيل ليس الا) …

سلام ومحبة
مهادن الزعيم