*انه الشعب ياسادة*
***************
مهادن الزعيم
∆ لو داير تعرف الناس البطلعوا مظاهرات في الشارع تابعين لي وين وبتحركهم ياتو جهة … الموضوع بسيط جدا اطلع معاهم موكب وحاتشوف العجب وحاتجي مشبع بالقناعة التامة انو التباينات دي مافي شي بجمعا وبطلعا الشارع غير حب الوطن …
∆ ح تلقاهم لوحة متجانسة فيها كل التنوع ومتفقين علي انو مافي عسكري بحكمنا … ح تلقاهم لو اتناقشوا في حاجة صوتهم ببقي عالي (حتى يخال اليك انهم مشتبكين فيما بينهم لا محالة) لكن مجرد م واحد يكورك اصحى ياترس الموكب بفوتنا كلهم بهتفوا (العسكر للثكنات) ……
∆ ح تلقي اللابس ردا واللابس جلابية واللابس كنغولية والفي رقبتو سبحة واللابس سكسك والشايل مصحف والمنقبة واللابسة توب والابسة عباية واللابسة بنطلون وكلهم برددو سوا (الثورة ثورة شعب والسلطة سلطة شعب) …
∆ مع اول قنبلة صوتية يضربوها فينا ح تلقي واحد هتف الله اكبر وما النصر الا من عند الله وح تلقى واحد تاني كورك ACAB وبتاع الكورفا هتف ميردا ميردا كجر برهان وبنات زغردن وشباب بشرو عرضو في سيرة الوطن ….
∆ لمن ينضرب واحد مننا ح تلقى البنيات بطببن في جروحو وبمسحن العرق والغبار والدم من وشو وواحدات بفتحن المصحف يقرن سورة يس والرابط الوحيد بينهم حبهم لهذا الوطن …
∆ ح تلقي ولد حالق شعرو علي الموضة والتاني حالق جوردن والتالت مبرم شعرو والرابع مضفرو بوب وجمبهم واحد ملتحي بناولهم في النيم عشان يتفادو بيهو البمبان وبردد حسبي الله ونعم الوكيل وصوفي بدق في النوبة وسط الاشتباك (حي قيوم حي قيوم) …
∆ ح تلقي الشبلي اللسة م شاف الحياة وعمك الماشي بعكاز والحاجة القاعدة في كرسي قدام بيتا ومنتظرانا عشان تزغرد لينا وتسقينا موية وتدعي لينا (ربنا ينصركم ربنا ينصركم) وح تلقي الشاب الشايف انو الخلاص الوحيد من كل مشاكلو بجي في التخلص من الحكم العسكري ….
∆ ح تلقى الموظف والعاطل وبتاع الورنيش والعندو دكتوراة والشالو من وظيفتو ظلم والمالاقي شغل والمغترب الجاء راجع بخفي حنين وناس الصالح العام … كلهم بهتفوا بصوت واحد (يسقط يسقط حكم العسكر) …..
∆ ح تلقي الواقف قدام ومجتهد انو يرجع البمبان والعرق النازل منو كانه في معركة وجمبو واحد مستمتع الاشتباك وبرجع ذات البمبان وبرقص وبغني وبقلع قميصو يلوح بيهو كأنو بحضر في كورة في استاد ولا في حفلة (والاتنين همهم الوطن رغم التباين الواضح في طريقة تعاطيهم مع الامر) …
∆ ح تلقي النوبة والطار والطبلة والدلوكة وصفارة الكورة والشايل لافتة طعمجة والكاتب فيها كلام بالانجليزي والرافع صورة شهيد والكاتب لافتة بالراندوك (بس المؤكد كل اللافتات دي معنونة تحت بالشعب اقوى والردة مستحيلة) …
∆ لو لسة في راسك فكرة انو في جهة واحدة غير الوطن والثورة ممكن تطلع {الملتحي والصوفي والمنقبة واللابسة بنطلون والكولومبي والفلوتر والمحزب) ياريت تراجع نفسك شوية … وردد بينك ويين نفسك (نحن جند الله جند الوطن) خمسة مرات في اليوم وعسى ولعل تعود لرشدك وتعلم ان الشعب اقوى والردة مستحيلة …
∆ انه الشعب ياسادة بكافة اطيافه الاجتماعية والثقافية والسياسية والدينية … كل منهم يخوض ثورته التي خرج من اجلها ومستعد للموت في سبيلها وجميعهم مؤقنين تماما ان المدخل الاساسي لتحقيق احلامهم يأتي عبر التحول الديمقراطي والحكم المدني …
∆ من عمل على تقسيمنا وتشتيتنا طوال ثلاثة عقود لن يصدق ابدا ان هذه الجموع (رغم تباينها) يمكن ان تتوحد تحت هتاف واحد وعلم واحد وهو (الثورة ثورة شعب والسلطة سلطة شعب والعسكر للثكنات) لذا تراه يهرطق بكلمة (مأجورين مأجورين) كلما رأي الحشود تقترب …
سلام ومحبة
