*جنازة الابيض ************
مهادن الزعيم
¶ قالوا في عزابة كانوا ساكنين في الابيض وجاهم حرامي بالليل ولموا فيهو خبت ولبع لحدي م الحرامي مات وراسهم اتشطب يعملو شنو ولا يتصرفوا كيف عشان يطلعوا من الورطة دي …
¶ واحد كن العزابة قال ليهم (خلونا اول نكفن المرحوم ونجهز الجنازة) وفعلا عملوا كدا … اها الصباح بدري شالوا الجنازة في عنقريب ودقشو ليها السوق وهم في طريقهم للمقابر … اها ناس السوق لمن شافو الجنازة حبوا يشاركوا في الاجر (عادتنا كسودانيين) وشالو العنقريب مع العزابة …
¶ العزابة كانو متفقين انو اي واحد فيهم لمن يشيلوا منو العنقريب ينسحب ويرجع البيت وفعلا دا الحصل ولمن الجنازة وصلت المقابر كانو شايلنها ناس السوق فقط …
¶ الناس لمن وصلوا المقابر ووقفوا صف عشان يصلو على الجنازة بقوا يسألو عن اهل المرحوم ويتلفتوا (م لقو ولا زول من اهل المرحوم) وبكدا العزابة اتخلصوا من مصيبتهم بمزاج …
¶ دا الحاصل حرفيا مع انقلاب 25 اكتوبر لانو امس لقيت فيديو لي مناوي بقول فيهو (نحن طرف تالت شركاء سلام فقط وماعندنا علاقة بالبحصل بيناتهم حتى لو طرف منهم انقلب على التاني) داير يطلع نفسوا باي طريقة ….
¶ القياديان بالعدل والمساواة (صندل وعشر) في الايام الاوائل كانو بتكلموا بي تبني كامل للانقلاب اما هسه بقو يقولو (لالا ياخ تعالو نقعد ونتحاور ونتشاور عشان نمرق البلد من الورطة دي) كأنهم م جزء من الموضوع ولا شاركوا في كل تفاصيله منذ 16 اكتوبر وإعتصام الموز ..
¶ عسكوري واردول صمتو صمت القبور اما طابور الاخبراء الاستراتيجيين حاليا هم في حالة م يعلم بيها الا الله لدرجة انو واحد فيهم قال دا انقلاب وقعد يضحك لمن قال الحقيقة اما (عقار وحجر وادريس) ف بياناتهم معنا وقواتهم مع الانقلابيين عشان في اي وقت يقولو والله نحن كنا معاكم شوفو بياناتنا….
¶ الانقلاب اصبح الان ذي (جنازة الابيض) واي واحد من العزابة الكانو بطبلوا للانقلاب هسة عايزين يزوغوا في نص السوق الحاصل ويطلعوا منها حتى (برهان وحميدتي) بدوها بتبني كامل وتاني قالو حمدوك معانا وهسه في الطريقة البتفكهم من البلوة دي …في النهاية الجنازة دي ح يشيلا ديك المسلمية (التوم هجو) براهو …
¶ بفعل صمود الشعب السوداني الاسطوري في الشارع ودفاعه عن ثورته وحريته التي مهرها بدماء الشباب فشلت كل مخططات الانقلابيين ومن شايعهم من الارزقية والكيزان وافسدوا كل مخططات المحاور العالمية … كل هذا تم لأن الشعب آمن بقوته ولان الشعب اقوى والردة مستحيلة ….
سلام ومحبة
